• The Public Today
  • उपेन्द्र यादव र राजेन्द्र महतोबीच गोप्य बैठक, भयो यस्तो सहमती !


    किरण कुमार कर्ण
    जनकपुरधाम, असार ७ गते ।
    समाजवादी पार्टी नेपालका केन्द्रीय अध्यक्ष उपेन्द्र यादव र राष्ट्रिय जनता पार्टी नेपालका संयोजक समितिका सदस्य राजेन्द्र महतोबीच जनकपुरमा अढाई घण्टे गोप्य कुराकानी भएको छ ।

    [custom-facebook-feed]

    गोप्य बैठकबाट पार्टी एकीकरणदेखि प्रदेश नम्बर २ को सरकारप्रतिको असन्तुष्टीलाई साम्य पार्न मन्त्रिमण्डलको फेरबदलसम्मको कुराकानी भएको जानकारी प्राप्त भएको छ ।

    लामो समयदेखि पार्टी एकीकरणको लागि औपचारिक तथा अनौपचारिक रुपमा छलफल बहस भईरहँदा समाजवादी पार्टी र राजपाबीच पार्टी एकीकरणको लागि सहमति जुटेको हो ।

    शुक्रबार जनकपुरमा अन्तर्राष्ट्रिय योग दिवसको अवसरमा उपप्रधानमन्त्री समेत रहेका यादव र नेता महतोबीच गोप्य वार्तापछि पार्टी एकीकरणको लागि सकारात्मक सहमति जुटेको समाजवादी पार्टीको एक नेताको दावी छ ।

    राजपा नेपालले पार्टी एकीकरणको लागि केन्द्रीय सरकारबाट फिर्ता हुनका लागि दवाव दिइरहेको बेला जनकपुरमा गोप्य बैठकबाट पार्टी एकीकरणका लागि छिट्टै नै कार्यविधि तय गरी अघि बढ्ने सहमति भएको बताइएको छ । 

    पार्टी एकीकरणको लागि समाजवादी पार्टी सधैँ सकारात्मक रहेको बताउँदै प्रदेश नम्बर २ का आर्थिक मामिला तथा योजना समेत रहेको समाजवादी पार्टी प्रदेश संयोजक विजयकुमार यादवले जानकारी दिए । 

    उनले तत्कालिन संघीय समाजवादी फोरमकै बेलादेखि राजपासँग एकीकरणको लागि पहल भइरहेको र हाल तत्कालिन नयाँ शक्ति पार्टी नेपालसँग समेत एकीकरण भइसकेकोले एकताको लागि सकारात्मक रहेको उनले प्रष्ट्याए ।

    त्यस्तै राजपा नेपालका प्रवक्ता कृष्ण सिंहले विगतदेखि पार्टी एकीकरणको सवालमा सहमति जुटिसकेकाले केहि सैद्धान्तिक सवालमा भने अझैँ कुराकानी मिल्न नसकेको बताए । उनले समाजवादी पार्टीले राष्ट्रपति प्रणाली, पार्टी अध्यक्ष मण्डल र प्रदेश सरकारको मन्त्रिमण्डल फेर्ने लगायतका विषयमा गम्भिर कुराकानी भएको जनाए ।

    प्रवक्ता सिंहले थप स्पष्ट पार्दै भने, ‘उपेन्द्रजीहरु कार्यकारी राष्ट्रपतिय शासन प्रणालीको पक्षमा हुनुहुन्छ भने राजपामा ६ वटा अध्यक्ष र समाजवादी पार्टीमा एउटा मात्रै अध्यक्ष रहेकाले यसमा पनि पेचिलो समस्या बन्दै गएकोले थप आन्तरिक गृहकार्यको आवश्यकता छ ।’

    त्यस्तै उनले प्रदेश सरकारको कार्यशैली र जनभावना अनुसार प्रदेश सरकारले काम गर्न नसकेको तथा केहि मन्त्रीहरुले मनपरी रुपमा काम गरेकाले सरकार र पार्टीको बदनाम भएको भन्दै प्रदेश सरकारलाई जनताप्रति उत्तरदायि बनाउनका लागि मन्त्रिमण्डल फेरबदलको समेत कुराकानी भएको बताए ।

    यता शुक्रबार दिउँसो नेपालका लागि भारतीय राजदुत रहेका मञ्जीव सिंह पुरीले एकीकरणको लागि दवाव दिँदै आइरहेको उच्च स्रोतले बताएको छ । सोहि अनुसार पार्टी एकीकरणको लागि अध्यक्ष यादव र नेता महतोबीच सिताशरण होटेलमा शुक्रबार विहान ९ बजेदेखि अढाई घण्टासम्म चलेको गोप्य वैठकले सकारात्मक रुप ग्रहण गरेपछि पार्टी एकीकरण हुने देखिएको बताइएको छ ।


    क्याटेगोरी : ब्रेकिङ्ग न्युज-१, राजनीति

    उहाँ द पब्लिक टुडेका विशेष संवाददाता हुनुहुन्छ ।

    प्रतिक्रिया दिनुहोस