• The Public Today
  • कोरोनाको उपचार : लक्षण देखिए अस्पताल, नदेखिए आइसोलेसन केन्द्रमा


    विराटनगर, जेठ १४ गते । कोरोना संक्रमितलाई वर्गीकरण गरेर उपचार गरिने भएको छ ।

    १ नम्बर प्रदेशमा कोरोना भाइरसको लक्षण देखिएकालाई कोभिड अस्पताल र रिपोर्ट पोजेटिभ आएकालाई आइसोलेसन केन्द्रमा राखेर उपचार गर्नेे तयारी शुरू गरेको प्रदेश सरकारले जनाएको छ ।

    सरकारले बिरामीलाई वर्गीकरण गरेर उपचार गर्ने तयारीसँगै ४५० शय्याको आइसोलेसन उपचार केन्द्र निर्माण कार्यलाई तीव्र पारेको छ । कोरोना संक्रमित वृद्धि भएसँगै उनीहरूको वर्गीकरण गरेर उपचार गर्ने तयारी शुरू गरिएको छ । प्रदेशमा यसअघि कोभिड–१९ उपचार केन्द्रका रूपमा  विराटनगर र सुनसरीको धरानमा सञ्चालन गरिसकेको छ ।

    मेची अस्पतालमा पनि कोरोना संक्रमितको उपचारका लागि अस्पताल तयार शुरू गरिँदैछ ।

    सामाजिक विकासमन्त्री जीवन घिमिरेले प्रदेश सरकारले पूर्वाञ्चल विश्वविद्यालय मोरङको गोठगाउँ, झापाको दमक, सुनसरीको वराहक्षेत्र र नेपाली सेनाको पूर्वी पृतना इटहरीमा गरी ४५० बेडको आइसोलेसन उपचार केन्द्र तयार गर्ने काम भइरहेको जानकारी दिए । स्वास्थ्य तथा जनसंख्यामन्त्री भानुभक्त ढकाल र सातै प्रदेशका सामाजिक विकास मन्त्रीको मंगलवार भएको अनलाइन संवादमा मन्त्री घिमिरेले सो जानकारी दिए ।

    प्रदेशमा कोरोना संक्रमितको उपचारलाई वर्गीकरण गर्ने तयारी गरिएको उनले बताए । मन्त्री घिमिरेले भने, ‘कोरोना लक्षण देखिएकालाई अस्पतालमा र रिपोर्ट पोजेटिभ आएकालाई आइसोलेसन उपचार केन्द्रमा राखिनेछ । संक्रमितको उपचार वर्गीकरण गरेर गर्ने गरी आवश्यक मार्गदर्शन र निर्देशिका प्रदेश सरकारले तयार गरिसकेको उनले बताए ।

    प्रदेशमा पुल विधिबाट कोरोना परीक्षणको काम शुरू भएको जानकारी दिँदै परीक्षणको क्षमता बढेसँगै आवश्यक सामग्रीको भने अभाव भएको उनले स्वास्थ्य तथा जनसंख्यामन्त्री ढकालको ध्यानाकर्षण गराएका थिए ।

    प्रदेशमा जेठ र असार भित्रमा ७० हजारको पीसीआर परीक्षण गर्ने गरी सरकारले काम गरिरहेको मन्त्री घिमिरेको जानकारी दिए । उनले ४० हजार प्रदेशवासी र ३० हजार भारतबाट आउनेको परीक्षण गर्ने तयारी शुरू गरिएको र पिसीआर परीक्षणको क्षमता बढाएसँगै किट अभाव भएको बताए । प्रदेशमा कन्ट्याक्ट टे«सिङ, टेस्टिङ र ट्रिटमेन्ट गर्ने टीम अलर्ट रहेको मन्त्री घिमिरे बताउँदै कोरोना संक्रमितको उपचार कोभिड अस्पतालबाट केन्द्रित गर्दा सरकारी अस्पतालले नियमित सेवा दिन सकेको उनले बताए ।


    क्याटेगोरी : ब्रेकिङ्ग न्युज-१, मुख्य समाचार, राष्ट्रिय, समाज


    प्रतिक्रिया दिनुहोस