• The Public Today
  • कार्यकर्ता रिहाइको माग गर्दै सिटी जुलुस


    द पब्लिक टुडे
    गौशाला, कार्तिक ८ गते ।
    आफ्ना कार्यकर्ता रिहा गर्नु पर्ने माग गर्दै डा. सीके राउत नेतृत्वको जनमत पार्टीले सिटी जुलुस निकालेको छ ।

    सोमबार प्रदेश २ का जिल्ला सदरमुकामहरूमा प्रहरीले कर्मचारी दुर्व्यवहार आरोपमा पक्राउ गरेका कार्यकर्ताहरुको रिहाइको माग गर्दै सिटी जुलुस निकालेको हो ।

    गत बुधबार खानेपानी तथा ढल निकास कार्यालयका निमित्त प्रमुख राजेश कुशवाहालाई जनमत पार्टीका कार्यकर्ताहरूले अर्धनग्न बनाएर नगर परिक्रमा गराएका थिए । त्यसलगत्तै प्रहरीले कर्मचारीलाई दुर्व्यवहार गरेको आरोपमा १७ जनालाई पक्राउ गरेको थियो ।

    आइतबार साँझ जनमत केन्द्रीय कार्यकारणी समितिको बैठकले भ्रष्टाचार, बेतिथि र कार्यकर्ता रिहाइको माग गर्दै सप्ताहव्यापी आन्दोलनको घोषणा गरेको थियो । सोही निर्णय अनुसार आज पहिलो दिन सिटी जुलुस निकालिएको हो ।

    जुलुसमा सहभागी नेता तथा कार्यकर्ताहरूले ‘भ्रष्टाचारीलाई कारबाही गर, हाम्रा कार्यकर्तालाई रिहा गर, भ्रष्ट सरकार मुर्दावाद, भ्रष्टाचारीलाई संरक्षण गर्न पाइँदैन’ लगायतका नारा लगाएका थिए ।

    पहिलो चरणको आन्दोलन अन्तर्गत मंगलबार प्रत्येक पालिकामा मोटरसाइकल र्‍याली, १० गते वडामा कोणसभा र मसाल जुलुस, ११ गते वडामा युवा दस्ता प्रशिक्षण र कात्तिक १२ गते जिल्ला सदरमुकाममा मसाल जुलुसल निकाल्ने तयारी गरेको छ ।


    क्याटेगोरी : ब्रेकिङ्ग न्युज-१, मुख्य समाचार, राजनीति, राष्ट्रिय


    प्रतिक्रिया दिनुहोस