अजय कुमार झा
जनकपुरधाम,चैत ७ गते । नेपालका लागि बेलायतका राजदूत निकोला पोलिटले मिथिला पेन्टिङको बजारीकरण तथा व्यवसायीकरणका लागि बेलायत सरकारले सहयोग गर्ने बताउनुभएको छ ।
बेलायती राजदूत पोलिटले जनकपुरधामको वडा नंं १५ कुवा रामपुरमा रहेको नारी विकास केन्द्रको स्थलगत निरीक्षण गर्नुहुँदै महिला सशक्तीकरणका लागि यसको बजारीकरण आवश्यक भएको बताउनुभयो ।
उहाँले मिथिला पेन्टिङमा लागेका महिलाहरूलाई आर्थिक रुपमा सबल बनाउनका लागि बेलायत सरकारको प्रतिनिधिको हैसियतले आफूले सक्दो रुपमा सहयोग गर्ने पनि बताउनुभयो ।
निरीक्षणको क्रममा नारी विकास केन्द्रमा मिथिला पेन्टिङमा सक्रिय रहनुभएका महिलाहरूले यसको बारेमा राजदूतलाई जानकारी दिँदै बजारीकरणमा सहयोग गरिदिन आग्रह गर्नुभएको थियो ।
निरीक्षण क्रममा जनकपुरधाम उपमहानगरपालिकाका उपप्रमुख रिता कुमारी मिश्र, जनकपुरधाम उद्योग वाणिज्य संघका अध्यक्ष जितेन्द्र महासेठ सहितका व्यक्तिहरूले बजारीकरण गर्नमा सहयोग गरिदिन बेलायती राजदूत निकोलालाई आग्रह गर्नुभएको थियो ।
कुनै बेला जनकपुरधामको कुवामा रहेको नारी विकास केन्द्रमा दर्जनौँ महिलाहरूले मिथिला पेन्टिङ, अन्य सिरामीकका सामानहरूको उत्पादन गर्दै आएका छन् । नारी विकास केन्द्रका मिथिला पेन्टिङसहितका सामानहरू देश विदेशमा निर्यात हुने गरेकोमा अहिले आएर बजारीकरणको अभावले शिथिल बनेको छ ।
अहिले थोरै महिलाहरू मात्र मिथिला पेन्टिङमा सक्रिय रहेका छन् । बेलायती राजदूतको निरीक्षण भ्रमणले यसको बजारीकरण बढ्ने आशामा महिलाहरू रहेका छन् ।
