द पब्लिक टुडे
गौशाला, जेठ ६ गते ।
धनुषामा निर्माणाधीन सडकको खाल्डोमा जमेको पानीमा डुबेर दुई बालकको मृत्यु भएको छ । मृत्यु हुनेमा कमला नगरपालिका–२ सराबे टोलका रामबाबु साहका ७ वर्षीय छोरा रितिक साह र उनकै भाइ श्यामबाबु साहका ५ वर्षीय छोरा रितिश साह छन् ।
घरबाट खेल्न निस्किएका दुवै जना बालक अबेरसम्म घर नआएपछि खोजतलास गरिएको थियो, सो क्रममा सडकको खाल्डोमा जमेको पानीमा तैरिरहेको अवस्थामा दुवै जना फेला परेका हुन् ।
नवनिर्मित कृषि बाटोको छेउमा रहेको खाल्डोमा जमेको पानीमा मंगलबार दिउँसो दुवै जना बालकको डुबेर मृत्यु भएको धनुषा प्रहरीले जनाएको छ ।
करिब १५ दिन अगाडि मात्र निर्माण भएको वडा नम्बर २ को सराबे टोलस्थित कृषि सडक बनाउन थालिएको थियो । खनेको खाल्डोमा वर्षाको पानी जमेको थियो ।
घरबाट खेल्न निस्केका बालक अबेरसम्म घर नआएपछि खोजतलास गर्ने क्रममा खाल्डोमा तैरिरहेको अवस्थामा शव फेला परेको प्रहरीले जनाएको छ ।
