दश दिनदेखि भोकालाई भोजन गराउँदै बर्दिबासका युवाहरु (फोटोफिचर)

बर्दिबास, जेठ २० गते । महोत्तरीको बर्दिबासका ५० जना असाहयहरुलाई दैनिक जनसहयोगी युवा सञ्जाल बर्दिबासले दश दिनदेखि दैनिक खाजा खुवाउँदै आएका छन् । लकडाउन बढ्दैं गएपछि मागेर जीवन चलाउनेहरुको भोकभोकै पर्न थालेपछि सञ्जालमा आवद्ध युवाहरुले गत जेठ १० गतेदेखि दैनिक खाजा वितरणको कार्य सुरु गरेका थिए ।

सञ्जालमा आवद्ध एक दर्जन बढी युवाहरुले दैनिक दिनदुःखीलाई भोजन गराउँदै आएका छन् । दश दिनको अवधिमा ३ सय ८२ जनालाई खाजा खुवाइएको सञ्जालका सह—कोषाध्यक्ष अनुप पोखरेलले जनाएका छन् ।

हाल बर्दिबास, लालगढ क्षेत्रमा रहेका असाहय, दिनदुःखीलाई कम्तिमा ५० जनालाई दैनिक खाजा खुवाउने गरिएको उनले बताए ।

दैनिक फरक—फरक खालमा परिकारहरु खाजामा वितरण गर्ने गरिएको खाजा वितरण गरिरहेको सञ्जालका सचिव मनोज महतोले जनाएका छन् ।‘कहिले दहिच्युरा, कहिले खिर—पुरी त कहिले हलुवापुरी खाजाको परिकार उहाँहरुलाई हामीले पस्किने गरेका छौं,’उनले भने । समोसा— अचार,फलफूल लगायतका खाजा वितरण गरिएको उनको भनाई छ ।दैनिकको खाजा परिकार फेरिएपनि चिया र पानी भने सधैं अनिवार्य हुने गरेको सञ्जालले जनाएको छ ।

दैनिक खाजा खुवाउँदै आएको सञ्जालाई आर्थिक अभाव भएको छ । खाजा खुवाउँदा ११ हजार ४१२ रुपैंया ऋण भएको सञ्जालका कोषाध्यक्ष ज्ञानेन्द्र महतोेले जनाए । सहयोगी हातहरु थपिदैं गएकोले सञ्जाललाई ऋण पनि नलाग्ने र खाजा कार्यक्रमले निरन्तरता पाउने उनको भनाई छ ।