वनरझुल्ला माविमा ‘चिल्ड्रेन पार्क’ बनाउँदै जनसहयोगी युवा सञ्जाल (फोटोफिचर)

• विजय कुमार सिंह

बर्दिवास, असार ३ गते । महोत्तरीको बर्दिवास नगरपालिका–९ पशुपतिनगरमा बाल उद्यान(चिल्ड्रेन पार्क) निर्माण हुने भएको छ ।

छोटो समयमै निकै चर्चामा रहेका बर्दिवासका जनसहयोगी युवा सञ्जालले पशुपतिनगरस्थित राष्ट्रिय माध्यमिक विद्यालय बनरझुल्लाको परिसरमा बाल उद्यान निमार्ण गर्न लागेको हो ।

युवा पत्रकार तथा समाजिक अभियन्ता राजकरण महतो र पत्रकार अमृत कुमार महतोको प्रयासमा जनसहयोगी युवा सञ्जालले विद्यालय परिसरमा बाल उद्यान निमार्ण गर्न लागेको हो ।

बुधवार प्रदेशसभा सदस्य शारदादेवि थापा र बर्दिवास नगरपालिकाका मेयर विदुर कुमार कार्कीले संयुक्त रुपमा सो बाल उद्यानको शिलान्यास गरेका हुन् ।

बाल उद्यानको निर्माण कार्य तीन चरणमा पूरा गर्ने योजना रहेको जनसहयोगी युवा सञ्जालका अध्यक्ष परमेश्वर महतोले जानकारी दिए । उनले पहिलो चरणको परियोजना ५० लाखको लागतमा निर्माण हुने जनाए ।

यो ठुलो परियोजना भएकोले सबैको साथ र सहयोग आवश्यक रहेको उनको भनाई छ । सबैको साथ र सहयोगले पहिलो चरणको निर्माण कार्य अबको २० दिनभित्र सम्पन्न गर्ने लक्ष्य लिएको अध्यक्ष महतोले सुनाए ।

विद्यालय निर्माण तपाई हाम्रो अभियान भन्दै विद्यालयको स्तरीय विकासका निम्ति जनसहयोगी युवा सञ्जालका युवाहरु जुटेका छन् ।

युवाहरुको यो अभियानमा सहयोगी हातहरु पनि अघि बढेका छन् । बाल उद्यान परियोजनाको शिलान्यास भएकै दिन करिब चारलाख आर्थिक सहयोग रकम संकलन भएको सञ्जालका अध्यक्ष परमेश्वर महतोले जानकारी दिए ।

बर्दिवास नगरपालिकाका मेयर विदुर कुमार कार्कीले युवाहरुले थालेको अभियान निकै प्रशंसनिय रहेको बताए । यो अभियानमा आफ्नो व्यक्तिगत र नगरपालिकाको तर्फबाट पूर्ण साथ र सहयोग रह्ने प्रतिबद्धता जाहेर गरेका छन् । विज्ञान र प्रविधिसँग विद्यार्थीलाई परिचित गराउन कम्प्युटर ल्याबसहितको शिक्षा प्रदान गर्न आवश्यक रहेको औल्याउँदै विद्यालयको भौतिक संरचनामा पनि नगरपालिकाको साथ सहयोग रहने मेयर कार्कीले जनाए ।

प्रदेशसभा सदस्य शारदादेवि थापाले विद्यालय निर्माणमा युवा अघि बढेकोमा खुशी व्यक्त गरेका छन् । उनले युवाहरुको बाल उघान गर्ने योजना अधुरो नरहने बताए ।

विद्यालय व्यवस्थापन समितिका अध्यक्ष रामजतन महतोको अध्यक्षतामा भएको परियोजनाको शिलान्यास कार्यक्रममा शिक्षा, विज्ञान तथा प्रविधि मन्त्रीका स्वकीय सचिव शंकर महतो, बर्दिवास नगरपालिका–९ का वडाध्यक्ष टेकविर रखाल मगर, युवा पत्रकार तथा सामाजिक अभियन्ता राजकरण महतो, विनायक होटलका सञ्चालक विष्णु खडका, यमाहा शोरुम बर्दिवासका सञ्चालक हेम थापा, विद्यालय व्यवस्थापन समितिका पदाधिकारी, प्रधानाध्यापक, शिक्षक–शिक्षिका, जनसहयोगी युवा सञ्जालका युवाहरु, स्थानीयलगायतको उपस्थिती रहेको थियो ।