एजेन्सी, फागुन १० गते : बेलायत र अमेरिकाले बर्माकी नेतृ आङ सान सुकीलाई तत्काल रिहा गर्न सैनिक सरकारलाई आग्रह गरेका छन्।
२२ दिनदेखि प्रहरी हिरासतमा रहेकी नेतृ सुकीलाई तत्काल रिहा गर्न बेलायतका विदेशमन्त्री डोमिनिक राबले आग्रह गरेका हुन्। विदेशमन्त्री राबले सैनिकलाई लोकतन्त्र फिर्ता गर्नसमेत आग्रह गरेका छन्।
बर्मामा सैनिक ‘कू’ पछि जारी विरोध प्रदर्शनमा २ जनाको मृत्यु भएपछि बेलायती विदेशमन्त्रीको यस्तो भनाइ आएको हो।
यसैबीच अमेरिकी विदेशमन्त्री एन्टोनी ब्लिंकनले आफूहरू बर्माका जनताको साथमा रहेको बताएका छन्। उनले बर्माका जनतामाथि हिंसा गर्नेविरुद्ध अमेरिकाले कडा कारबाही गर्ने चेतावनीसमेत दिएका छन्। ब्लिंकनले जनताले लोकतान्त्रिक रूपमा चयन गरेको सरकार पुन:स्थापना माग गरेका छन्।
बर्मामा सैन्य ‘कू’ को विरोध गर्ने क्रममा भएका झडपमा दुई जनाको मृत्यु भएपछि त्यहाँका नागरिकले देशव्यापी आम हड्ताल गरेका छन्। सरकारले देशभर कर्फ्यू घोषणा गरेका बेला लोकतन्त्र पक्षधर प्रदर्शनकारीले आम हड्ताल गरेका हुन्।
गत फेब्रुअरी १ मा सैनिकले जननिर्वाचित सरकारलाई अपदस्थ गरी सरकारमाथि नियन्त्रण जमाएको थियो।
