• The Public Today
  • धार्मिक पर्यटन प्रदेश सरकारको प्राथमिकतामा : मुख्यमन्त्री


    जनकपुरधाम, चैत्र २६ गते । मुख्यमन्त्री लालबाबु राउतले प्रदेशको विकासका लागि प्रदेश सरकारले धार्मिक पर्यटनलाई प्राथमिकतामा राखेर अघि बढेको बताउनु भएको छ।

    सिरहाको लहान १८ स्थित पकडीया गढको संरक्षण सम्बद्र्धनको उद्देश्यले आयोजित पाँचौ पकडीया गढ महोत्सवको उद्घाटन गर्नु हुँदै मुख्यमन्त्री राउतले पकडीया गढको विकासको लागि प्रदेश सरकारले हर सम्भव सहयोग गर्ने प्रतिबद्धता जनाउनु भएको छ । उहाँले पकडीया गढको वृहत डिपिआर तयार गर्न संरक्षण समितिलाई आग्रह समेत गर्नु भएको हो ।

    अगामी आर्थिक वर्षमा प्रदेशको धार्मिक पर्यटकीय करिडोर निर्माणको कार्य शुरु हुने उल्लेख गर्नु हुँदै मुख्यमन्त्री राउतले राजा सहलेशको गाथा संग जोडिएको पकडीया गढलाई पनि करिडोर भित्रै राखेर विकास कार्य अघि बढाउने उल्लेख गर्नु भयो । धार्मिक पर्यटकीय करिडोरको निर्माण पछि लाखौ आन्तरिक तथा बाह्य पर्यटक भित्र्याउने लक्ष्य प्रदेश सरकारले राखेको उल्लेख गर्नु हुँदै उहाँले त्यस पछि यस क्षेत्रमा आर्थिक गतिविधी तीब्र हुने बताउनु भयो । गंगाबहादुर राउत क्षेत्रीको अध्यक्षतामा भएको महोत्सव उद्घाटन समारोहमा स्थानीय जनप्रतिनिधिहरु, विभिन्न राजनीतिक दलका नेताहरुको उपस्थिति रहेको थियो ।

    महोत्सव उद्घाटन अघि सोही वडामा युथ मुस्लिम वेलफेयर सोसाइटीद्वारा आयोजित स्वागत तथा सम्मान कार्यक्रममा मुख्यमन्त्री राउतले मुस्लिम समुदायलाई शिक्षामा जोड दिनु पर्ने बताउनु भएको थियो । प्रदेश सरकारले मुस्लिम समुदायको शिक्षाको लागि मदरसा बोर्ड गठन गर्न लागेको उल्लेख गर्नु हुँदै मुख्यमन्त्री राउतले मदरसा बोर्ड गठन भै सकेपछि मदरामा अध्ययन गर्नेहरुले समेत सरकारी मान्यता पाउने बताउनु भयो । मुख्यमन्त्री राउतले आजै लहान स्थित जे एस मुरारका बहुमुखी क्याम्पसको निरीक्षण भ्रमण समेत गर्नु भएको छ ।


    क्याटेगोरी : ब्रेकिङ्ग न्युज-१, समाज


    प्रतिक्रिया दिनुहोस