दिनेश शर्मा
राजविराज, फागुन १५ गते । सप्तरीको खडक नगरपालिका– ५ का वृद्ध दम्पतिको हत्यामा लुटेरा समूह संलग्न रहेको हुनसक्ने प्रहरीले अनुमान गरेको छ।
घटनास्थलको निरीक्षण तथा प्रारम्भिक अनुसन्धानले घटनाको प्रमुख कारण लुटपाट हुनसक्ने देखिएको एसपी राजेन्द्र बिष्टले बताए।
‘हामीले घट्नास्थलको प्रकृति तथा अवस्थाका बारेमा हेर्यौँ,’ उनले भने, ‘हत्याको प्रमुख कारण नगद र गहना लुटने मनसाय नै देखियो।’
पूर्वपश्चिम राजमार्ग अन्तर्गत खडक नगरपालिका ५ स्थित खरचुहिया बजार निवासी ७० वर्षीय सबुरी साह र उनकी पत्नी ६५ वर्षीया बेचनीदेवीको मंगलबार बिहान अज्ञात समूहले हत्या गरेको थियो।
दुवैको शव कोठाभित्रै जलाइएको अवस्थामा बिहान करिब ८ बजे फेला परेको प्रहरीले जनाएको छ।
बिहान करिब साढे ७ बजे दुध पुर्याउन आएका व्यक्तिले घरको गेट बन्द देखेपछि सोधखोज गर्न थालेपछि मात्रै घटना बाहिर आएको हो।
घटनास्थल तथा हत्याराले आउजाउका लागि प्रयोग गरेको बाटोमा रगतका टाटा फेला परेका छन्। घरको पश्चिमपट्टिको पर्खालमा होर्डिङ बोर्डका लागि तयार गरिएको फ्रेम प्रयोग गरेर संलग्न व्यक्तिहरु आवत–जावत गरेको प्रहरीको अनुमान छ।
‘पर्खाल र फलामको फ्रेममा रगतका टाटा देखिएका छन्’ एसपी बिष्टले थपे, ‘हामीले फरेन्सिक ल्याबको टिम बोलाएर प्राविधिक रुपमा पनि अध्ययन सुरु गरेका छौं, धेरै कुरा अनुसन्धानबाट पनि खुल्दै जानेछ।’
डेढ किलोमिटरमा पुगेर अड्कियो कुकुर
हत्याको अनसुन्धानका लागि सुनसरीको धरानस्थित पूर्व क्षेत्रीय प्रहरी आवासीय माद्यमिक विद्यालयबाट झिकाइएको कुकुर घटनास्थलबाट पश्चिमतर्फ करिब डेढ किलोमिटर दुरीमा रहेको पोखरीमा गएर अड्किएको छ। पोखरीको छेउमा कस्तुरी मदिराको बोतल बरामद भएको छ।
भारतको बिहार प्रदेशमा मदिरा निशेष गरेपछि नेपालबाट भारत तस्करी हुने मध्ये ‘कस्तुरी ब्राण्ड’ प्रमुख हो। भारत तस्करी हुँदै गर्दा प्रहरीले हालसम्म बरामद गरेको अधिकांश मदिरामा कस्तुरीको परिमाण धेरै छ।
हत्याराले पोखरीमा पुगेर शरीर तथा रगत सफा गरी मदिरा सेवन गरेर हिँडेको हुनसक्ने अनुमान गरिएको छ।
मिलको व्यवसाय छाडेर ब्याजमा ऋण लगानीको कारोबार
जग्गा तथा गहना बन्धक राखी ब्याजमा ऋण लगाउने कारोबारमा संलग्न रहेका साह दम्पतिको सोही कारण हत्या भएको हुनसक्ने स्थानीयले आशंका गरेका छन्।
लामो समयदेखि खरचुहियामा बसोबास गर्दै आएका सबुरीको मुख्य घर तत्कालीन बनरझुला–३ हो।
स्थानीयका अनुसार बनरझुलामा उनको मिलको व्यवसाय थियो। छोराहरू सत्यनारायण र तेजनारायण सरकारी जागिरे भएपछि उनीहरू मिल बेचेर खरचुहिया सरेका थिए।
जेठा छोरा सत्यनारायण सुनसरीको धरानस्थित विपी कोइराला स्वास्थ्य विज्ञान प्रतिष्ठान र कान्छा छोरा तेजनारायण उदयपुर सदरमुकाम गाईघाटस्थित खानेपानी कार्यालयका इन्जिनियर हुन्।
छोराहरू जागिरमा लागेपछि खरचुहिया स्थित घरमा दम्पति मात्रै बस्दै आएका थिए। करिब ५/७ वर्षअघि प्यारालाइसिसका कारण सबुरी थला परेपछि पत्नी बेचनीले ऋणको कारोबार गर्दै आएकी थिइन्।
उनीहरूको करिब ३० देखि ४० लाख रुपैयाँ गाउँमा लगानी रहेको स्थानीयको अनुमान छ।
