काठमाडौँ, चैत २४ गते ।
नियमित रूपमा बजार अनुमगन तथा निरीक्षण गरी कानुन कार्यान्वयन गराउँदै आएको वाणिज्य, आपूर्ति तथा उपभोक्ता संरक्षण विभागले काठमाडौँका दुई फर्मलाई जरिवाना गरेको छ।
स्थलगत अनुमगनका क्रममा कैफियत देखिएपछि विभागले मछिन्द्रनाथ किराना स्टोर डिल्लीबजार र सोही स्थानको एलन स्टोरलाई १० १० हजार रुपैयाँ जरिवाना गरेको हो।
उपभोक्ता संरक्षण ऐन, २०७५ को दफा १५ बमोजिमको कार्य नगरेको पाइएकाले ती फर्मलाई जरिवाना गरिएको विभागले जनाएको छ।
विभागले सोमबार काठमाडौँका २१ फर्ममा स्थलगत अनुमगन गरेको थियो। त्यसमध्ये १९ वटालाई भने सुधारात्मक निर्देशन दिएको छ।
स्थानीय सरोकार भएका निकायका प्रतिनिधि र उपभोक्ता अधिकारकर्मीको उपस्थितिमा विभागले नियमित रूपमा बजार अनुमगन गर्दै आएको छ।
