धनुषा, असार ६ गते ।
मधेस प्रदेश सरकारका मुख्यमन्त्री कृष्णप्रसाद यादवले खेल पूर्वाधार विस्तारलाई प्रदेश सरकारको उच्च प्राथमिकतामा राखिएको बताएको छ ।
आजदेखि सुरु भएको ‘निको कप’ राष्ट्रिय महिला टी–२० क्रिकेट प्रतियोगिताको उद्घाटन समारोहमा उहाँले प्रदेशमा अन्तरराष्ट्रियस्तरका खेल आयोजना गर्न सक्ने वातावरण निर्माण गर्ने उद्देश्यले रङ्गशाला निर्माणको काम अघि बढाइएको बताए ।
मुख्यमन्त्री यादवले खेलकुदलाई युवाको प्रतिभा प्रस्फुटन, अनुशासन र सामाजिक रूपान्तरणसँग जोडिएको क्षेत्रका रूपमा उल्लेख गर्दै आवश्यक पूर्वाधार निर्माणमा प्रदेश सरकार पछि नहट्ने स्पष्ट पारियो ।
प्रदेशको महत्वाकाङ्क्षी आयोजना रामजानकी बहुउद्देश्यीय अन्तरराष्ट्रिय रङ्गशालाको शिलान्यास चालु वर्षभित्र गरिने घोषणा गरियो ।
मधेस प्रदेशका भूमि व्यवस्था, कृषि तथा सहकारीमन्त्री श्यामप्रसाद पटेलले खेल क्षेत्रको विकासका लागि सरकारी तथा निजी क्षेत्रबीच सहकार्य आवश्यक रहेको बताए । उनले खेलाडीलाई प्रोत्साहन गर्ने नीति र कार्यक्रमलाई प्रभावकारी रूपमा कार्यान्वयन गरिने उल्लेख गरियो ।
मधेस खेलकुद परिषद्का उपाध्यक्ष शिवजी गुप्ताले प्रदेशमा खेल संस्कृतिको विकास गर्ने उद्देश्यले ‘खेली मधेस, जिती मधेस’ अभियान सञ्चालन गरिएको जानकारी दिए । सोही अभियानअन्तर्गत खेलाडीको वृत्तिविकासका लागि प्रत्येक खेलाडीलाई मासिक दुई हजार ५०० उपलब्ध गराउने व्यवस्था गरिएको उनले बताए ।
नेपाल खेलकुद महासङ्घका अध्यक्ष परशुराम बस्नेत, नेपाल क्रिकेट सङ्घका उपाध्यक्ष रोशन सिंह, महासचिव धर्म लामालगायतले महिला क्रिकेटको विस्तार, खेलाडी उत्पादन र पूर्वाधार विकासमा सबै पक्षको साझा प्रयास आवश्यक रहेको धारणा राखियो ।
प्रतियोगितामा सातै प्रदेशका महिला क्रिकेट टोलीसँगै सशस्त्र प्रहरी बल नेपालको टोली गरी आठ टोलीको सहभागिता रहेको आयोजकले जनाएको छ । उद्घाटन खेलमा मधेस प्रदेश र कोशी प्रदेश आमनेसामने भएका छन् ।
