पाल्पा, साउन २२ गते ।
भारतबाट अवैध रूपमा ल्याइएको ठूलो परिमाणको मदिरासहित पाल्पा प्रहरीले एउटा भारतीय कार र दुई जना भारतीय नागरिकलाई नियन्त्रणमा लिएको छ।
बुधबार राति करिब ११ बजेको समयमा पाल्पाको तिनाउ गाउँपालिका, ३ स्थित पैठेडाँडा चेकपोष्टमा खटिएको प्रहरी टोलीले जाँचका क्रममा उनीहरूलाई पक्राउ गरेको हो।
पक्राउ पर्नेमा कार चालक भारतको लखनउ बस्ने ३७ वर्षीय एमा मोदिन र सोही कारमा सवार ४३ वर्षीय शिवनाथ मौर्या रहेको प्रहरीले जनाएको छ । प्रहरी चौकी दोभान पाल्पाबाट खटिएको प्रहरी टोलीले जाँच गर्ने क्रममा भारतको गोरखपुरबाट पोखरातर्फ जाँदै गरेको यूपी ३२ एसटी४२८६ नम्बरको कारबाट ७५३ बोतल अवैध मदिरा बरामद भएको जनाएको छ।
बरामद गरिएका मदिरामा ७५० एमएलको वर्ल्ड मंक, ५ सय ११ बोतल र ७५० एमएल कै १२ बोतल सिङ्नेचर मदिरा रहेको प्रहरीले जनाएको छ । प्रहरीका अनुसार बरामद गरिएको मदिराको अनुमानित बजार मूल्य करिब सात लाख एकाउन्न हजार दुई सय रुपैयाँ रहेको छ।
बरामद गरिएको मदिरा, सवारी साधन र पक्राउ परेका दुवै जनालाई आवश्यक अनुसन्धान तथा कारबाहीका लागि प्रहरी चौकी दोभानको नियन्त्रणमा राखिएको छ। घटनाका सम्बन्धमा थप अनुसन्धान कार्य भइरहेको पाल्पा प्रहरीका सूचना अधिकारी भिमलाल भट्टराईले जानकारी दिए ।
