काठमाडौँ, माघ २५ गते ।
कलाकर्मीहरूले ‘राते काइँला’ नामले परिचित अभिनेता सुनील थापाको निधनले समग्र कलाकारिता जगतमा अपुरणीय क्षति पुगेको बताएका छन् ।
शनिबार बिहान अचानक स्वास्थ्यमा समस्या देखिएपछि उपचारका लागि थापाथलीस्थित नर्भिक अस्पतालमा पुर्याइएका ६८ वर्षीय थापाको दुःखद् निधन भएको थियो ।
प्रारम्भिक जाँच गरेपछि अस्पतालले उनलाई शनिबार बिहान ७ बजेर ४४ मिनेटमा निधन भएको घोषणा गरेको थियो । नेपालीसँगै भारतीय चलचित्रमा प्रसिद्ध नाम बनेका अभिनेता थापाको निधन चलचित्रकर्मी स्तब्ध भएका छन् । पछिल्लो समय थापाले नेपाली चलचित्र ‘राम नाम सत्य’ को छायाङ्कन गरिरहेका थिए ।
उक्त चलचित्रमा खलपात्रको भूमिकामा निर्वाह गरिरहनुभएका थापाको आज छायाङ्कनको अन्तिम दिन शनिबार रहेको उक्त चलचित्रका निर्देशक माइकल चन्दले जानकारी दिए ।
उनले भने, “शुक्रबार राति १० बजेसम्म अभिनेता थापा छायाङ्कनमै थिए । हामीले उनको सम्पूर्ण काम शुक्रबार राति नै सकाउने तयारी गरेका थियौँ तर उनले नै शनिबार बिहान गरौँ भनेपछि सारेका थियौँ । पछिल्लो समय झण्डै चार हप्तादेखि उनले चलचित्रमा काम गरिरहेका थिए ।
निर्देशक चन्दका अनुसार खलपात्रको भूमिका निर्वाह गरिरहेका थापाको अन्त्येष्टिकै दृश्य शनिबार छायाङ्कन गर्ने तयारी भएको थियो । उनले निर्वाह गरेको खलपात्रलाई चलचित्रका अभिनेता विराज भट्टले ‘राम नाम सत्य’ को छायाङ्कन गर्ने दृश्य थियो ।
निर्देशक चन्दले भावविह्वल हुँदै भने, “चलचित्रमा उनलाई जलाउने दृश्य खिच्नु थियो । हामीले केही दिनदेखि द्वन्द्वका दृश्य छायाङ्कन गरिरहेका थियौँँ, सोही कारण एकहप्तादेखि निरन्तर छायाङ्कनमा संलग्न थियौँ । उनले शनिबार बिहान ६ बजेदेखि १० बजेसम्म छायाङ्कन गरेर एउटा पारिवारिक समारोहमा सहभागी हुनुपर्ने कुरा बताएका थिए। शुक्रबार बेलुका नियमित रुपमा छुटिएका थियौँ, त्यो नै अन्तिम भेट भयो ।”
उनीसँगै चलचित्रमा अभिनय गरिरहेका अभिनेता प्रशान्त ताम्राकारले अभिनेता थापाको निधनलाई पत्याउन गाह्रो भइरहेको बताए ।
“शनिबार बिहान हामी अभिनेता थापालाई छायाङ्कनका लागि कुरिरहेका थियौँ, अचानक उहाँ नरहेको खबर आयो । मैले चलचित्र ‘राम नाम सत्य’ मा पहिलो दृश्य उनीसँगै दिएँ, हिजो बेलुकी अन्तिम दृश्य पनि उनीसँगै भयो । उनले मलाई छायाङ्कन अवधिभर प्रोत्साहन गरिरहे, आफ्नो अनुभवले हामीलाई मार्गनिर्देश गर्थे”, अभिनेता ताम्राकारले भने।
अभिनेता भुवन केसीले चलचित्र क्षेत्रले देशकै अब्बल कलाकार गुमाएको प्रतिक्रिया दिए । नेपालीसँगै भारतीय चलचित्रमा स्थापित भएका अभिनेता थापा आफ्नो एक असल मित्र रहेको उनले बताए ।
“अभिनेता थापा मेरा लागि कलाकारभन्दा पनि असल मित्र थिए । चलचित्र ‘चिनो’ मा पहिलोपटक काम गरेयता हामीले थुप्रै चलचित्रको सेटमा कैयौँ अन्तरङ्ग क्षण बिताएका थियौँ । मैले निर्माण गरेका चलचित्रहरु ‘सपना’ देखि ‘क्याप्टेन’ सम्म हामीले सहकार्य गरेका छौँ । उनी र म अर्कालाई भेट्दा सधैँ के छ दोस्त भनेर सोध्थ्यौँ । उनको बिदाइले हामीलाई अपुरणीय क्षति पुगेको छ”, अभिनेता केसीले भने ।
अभिनेता राजेश हमालले अभिनेता थापालाई एक अद्भूत क्षमता भएका सहकर्मीका रुपमा स्मरण गरिरहने बताएको छ । उनले सामाजिक सञ्जालमार्फत अभिनेता थापाले कलाकारितामा देखिएको रिक्तता कहिल्यै भरिन नसक्ने उल्लेख गरेका थिए ।
“नेपाली चलचित्रको इतिहासमा तपाईं एउटा महत्वपूर्ण मोड छन् । मेरो चलचित्र यात्रा तपााईंप्रति समर्पित गर्दछु । तपाइको अभाव सधैँ महसुस हुनेछ”, अभिनेता हमालले उल्लेख गरेका छन् ।
नेपाली चलचित्र ‘चिनो’मार्फत अभिनेता थापालाई नेपाली चलचित्रमा स्थापित गराएका निर्देशक तुलसी घिमिरेले पात्रलाई जीवन्त बनाउन सक्नु नै उनको खुबी रहेको बताए ।
“अभिनेता थापाले आफ्नो कामलाई सधैँ गम्भीरतापूर्वक लिएर सम्पन्न गर्न मेहनत गरे । पछिल्लो समय मैले चलचित्र ‘पहाड’ मा उनीसँग काम गरेँ, उनका मेहनत भाव देखेर म खुसी थिएँ । हामीले उनको दृश्यलाई समावेश गरेर प्रचार गर्न श्रव्यदृश्य ९टिजर० तयार गरेका थियौँ, त्यही देखाउने सल्लाह हुँदै थियो, अचानक दुःखद् खबर सुनेँ । उनको अनुपस्थिति हामी चलचित्रकर्मीलाई महसुस हुनेछ”, निर्देशक घिमिरेले भने ।
नेपाल चलचित्र कलाकार सङ्घका अध्यक्ष मोहन निरौलाका अनुसार अभिनेता थापाको शवलाई अन्तिम श्रद्धाञ्जलीका लागि १ बजेर ३० मिनेटसम्म चाबहिलस्थित चलचित्र विकास बोर्डको प्राङ्गणमा राखेर पशुपति आर्यघाटमा लगी उनको अन्त्येष्टि सम्पन्न भएको छ ।
अभिनेता थापाको जन्म २०१७ जेठ ६ गते दाङमा भएको थियो । कलाकारिता गर्नुअघि उनले मुम्बईमा मोडलिङ, फुटबल खेल तथा फोटो पत्रकारिताजस्ता क्षेत्रमा काम गरे। भारतीय चलचित्र ‘एक दुजे के लिये’ बाट कलाकारिताको सुरुआत गरेका थापाले नेपाली चलचित्र ‘मसाल’ मार्फत नेपालमा अभिनय यात्रा प्रारम्भ गरे । करिब ३०० भन्दाबढी चलचित्रमा अभिनय गरेका थापाले नेपाली, हिन्दी र भोजपुरी भाषाका चलचित्रमा काम गरेको छ । पछिल्लो समय ‘द फ्यामिली म्यान’ नामक भारतीय वेब शृङ्खलाले उनलाई चर्चामा ल्याएको थियो । नेपाली चलचित्रले एक अनुभवी कलाकार र अमूल्य सांस्कृतिक धरोहर गुमाएको कलाकार, चलचित्रकर्मी तथा शुभेच्छुकहरूले बताएका छन् ।
उनलाई कलाकर्मीले सामाजिक सञ्जालमार्फत श्रद्धाञ्जली दिइरहेका छन् । भारतीय कलाकार प्रियङ्का चोपडा जोनस, मनोज बाज्पायीलगायतले पनि सामाजिक सञ्जालमार्फत अभिनेता थापाप्रति श्रद्धाञ्जली व्यक्त गरेको छ । चलचित्रमा खलनायक पात्रलाई पनि अभिनेतासरह चर्चा र सम्मान दिलाउन सफल थापा ‘राते काइँला’ पात्रमार्फत विशेष रूपमा लोकप्रिय हुन्थ्यो । उनको एक श्रीमती, एक छोरा र एक छोरी हुन्।
