काठमाडौं, भदौ १० गते ।
आज बिहान आएको बाढीपछि रसुवाका ६ जना स्वास्थ्यकर्मी सम्पर्कविहीन भएका छन् । जनस्वास्थ्य कार्यालय रसुवाका प्रमुख निरध्वज घर्ती मगरले दिएको जानकारी अनुसार टिमुरे र स्याप्रुबेसीमा रहेको स्वास्थ्यचौकी बाढीले बगाएको छ । दुवै स्वास्थ्यचौकीमा कार्यरत २–२ जना स्वास्थ्यकर्मी हालसम्म सम्पर्कमा आएका छैनन् ।
त्यसैगरी रसुवागढी नाकाका हेल्थ डेक्समा कार्यरत हेल्थ असिस्टेन्ट गोविन्द यादव पनि सम्पर्कविहीन छन् । उत्तरगया गाउँपालिका स्वास्थ्य संयोजक पनि सम्पर्कमा नआएको घर्ती मगरले जानकारी दिए ।
धेरै ठाउँको सञ्चार सम्पर्क टुटेकाले सबै जानकारी प्राप्त हुन नसकेको जनस्वास्थ्य कार्यालयका सूचना अधिकारी तारापती बिसीले बताए ।
