काठमाडौं, भदौ १५ गते ।
नेपालमा भएको विपद्बाट प्रभावित नागरिकप्रति ऐक्यबद्धता जनाउँदै भारतको सिक्किमले आवश्यक राहत तथा स्वास्थ्य सहायता सामग्री पठाएको छ ।
सिक्किम क्रान्तिकारी मोर्चाको टोलीलाई मुख्यमन्त्री प्रेमसिंह गोलेले ‘सिक्किम फर नेपाल’ अभियानअन्तर्गत राहत र स्वास्थ्य सामग्री बोकेको गाडीलाई सोमबार विदाइ गरेका छन् ।
सिक्किमको यो पहलले विपद्को समयमा मानवीय संवेदना, करुणा र भ्रातृत्वको भावना प्रस्तुत गरेको मुख्यमन्त्री गोलेले उल्लेख गरेका छन् ।
विपद्को कठिन घडीमा एकजुट हुँदै आवश्यक परेकालाई सहयोगको हात बताएको उनले उल्लेख गरेका छन् ।
सिक्किमले विपद्मा ज्यान गुमाएका व्यक्तिका परिवारप्रति समवेदना व्यक्त गर्दै प्रभावित तथा पीडितप्रति उनले समहानुभूति प्रकट गरेका छन् । पुनर्स्थापना र पुनर्निर्माणको यात्रामा रहेका नेपाली जनताप्रति आफ्नो पूर्ण ऐक्यबद्धता रहेको उनले उल्लेख गरेका छन् ।
