द पब्लिक टुडे
ढल्केवर, साउन ३० गते ।
धनुषाको बटेश्वरका गल्ली र चोकबाट सुरु भएको एउटा युवाको सामाजिक यात्रा अहिले राष्ट्रिय मञ्चसम्म पुगेको छ । गाउँमा देखिएका समस्या र समुदायका आवश्यकता बुझ्दै सामाजिक काममा होमिएका सरोज कुमार महतो देशका ४० प्रभावशाली युवाको सूचीमा परेका छन् ।
महतो ‘४० मुनिका ४०–२०८३’ अन्तर्गत छनोट भएका ४० प्रभावशाली युवामध्ये परेका हुन् । बटेश्वर गाउँपालिका–३ बाट सामाजिक अभियानमा सक्रिय महतोले पछिल्लो समय आफ्नो कामको दायरा स्थानीय सीमाभन्दा बाहिर विस्तार गर्दै आएका छन् ।
सामाजिक काममा लाग्दा उनले ठूलो मञ्च खोजेनन् । समुदायमा देखिएका समस्या नै उनका लागि अभियानका विषय बने । युवालाई सामाजिक गतिविधिमा जोड्ने, नागरिकलाई आफ्ना अधिकार र दायित्वप्रति सचेत बनाउने तथा स्थानीय शासनमा नागरिक सहभागिता बढाउने काममा उनी निरन्तर सक्रिय रहँदै आएका छन् ।
उनको सामाजिक यात्राको अर्को महत्वपूर्ण पाटो हो–रक्त व्यवस्थापन । रगतको अभावमा उपचार प्रभावित हुने अवस्थालाई नजिकबाट बुझेका महतोले रक्तदान अभियानसँग आफूलाई जोड्दै आएका छन् । आवश्यकतामा रहेका बिरामीका लागि विभिन्न स्थानमा रक्त सहजीकरण गर्ने कामलाई उनले निरन्तरता दिँदै आएका छन् ।
रगत जुटाउनेदेखि नागरिकका आवाज उठाउनेसम्मका अभियानमा सक्रिय रहँदा महतोले युवाको भूमिकालाई केवल सामाजिक सञ्जाल वा भाषणमा सीमित राख्न नहुने मान्यता अघि सारेका छन् । समाजमा देखिएका समस्याको समाधानमा युवा आफैं अग्रसर हुनुपर्ने उनको बुझाइ छ ।
स्थानीय तहदेखि राष्ट्रियस्तरसम्म सामाजिक अभियानमा जोडिँदै आएका महतोको यही सक्रियता अहिले ‘४० मुनिका ४०’ को सूचीमा पुगेको छ । बटेश्वरको एउटा स्थानीय परिवेशबाट सुरु भएको उनको यात्रा राष्ट्रिय पहिचानमा रूपान्तरण हुनु आफैंमा नयाँ पुस्ताका लागि प्रेरणाको विषय बनेको छ ।
गाउँमा देखिएको समस्या समाधान गर्ने सानो प्रयासबाट सुरु भएको यात्रा अहिले देशका प्रभावशाली युवाको सूचीसम्म पुगेको छ । महतोका लागि यो केवल सम्मानको सूचीमा परेको उपलब्धि होइन, बटेश्वरबाट सुरु भएको सामाजिक यात्राले पाएको राष्ट्रिय पहिचान पनि हो ।
