• The Public Today
  • बर्दिवास मेडिकल कलेजको पूर्वाधार विकास आयोजनाको कार्यालय स्थापना


    बर्दिवास, वैशाख १८ गते । महोत्तरीको बर्दिवासमा मेडिकल कलेज स्थापनाका लागि पूर्वाधार विकास आयोजनाको कार्यालय स्थापना गरिएको छ ।
    नेपाल सरकारको शिक्षा, विज्ञान तथा प्रविधि मन्त्रालय अन्तर्गत बर्दिवास मेडिकल कलेज पूर्वाधार निर्माणको लागि आयोजनाको कार्यालय स्थापना गरेको आयोजना प्रमुख देवीप्रसाद सुवेदीले जानकारी दिए ।

    कार्यालयको एक कार्यक्रम बीच उपप्रधानमन्त्री एवम् रक्षामन्त्री इश्वर पोखरेलले उदघाटन गरेका हुन् । गत फागुन ३ गते बसेको मन्त्रिपरिषद् बैठकले प्रदेश २ को महोत्तरीको बर्दिबास सरकारी मेडिकल कलेज स्थापनाका लागि पूर्वाधार निर्माण विकास आयोजना स्वीकृत गरेको थियो ।
    आयोजना कार्यालय स्थापना भएसंगै मेडिकल कलेजको लागि आवश्यक काम कारवाही यथासिघ्र सुरु हुने उनले बताए ।

    सरकारले आर्थिक वर्ष २०७३/०७४ मा स्थापना गर्ने निर्णय भएको थियो । कलेज स्थापनाको लागि बर्दिवास नगरपालिका १ मा आवश्यक ७५ रोपनी जग्गा सिफारिस गरिएको छ ।

    सिफारीस भएको जग्गामा सरकारी वन रहेकोले मन्त्रालयमा आवश्यक प्रक्रियाको कारण रोकिएको छ । कलेज पूर्वाधार निर्माण विकास आयोजना कार्यालयका प्रमुख सुवेदीले चालु आर्थिक वर्षमा अर्थमन्त्रालयले करिब ८७ लाख रुपैया छुट्टयाएको जानकारी दिए ।

    स्थापना भएको कार्यालयमा आयोजना प्रमुखसहित ७ जना कर्मचारीको दरबन्दी रहेको आयोजना प्रमुख सुवेदीले जानकारी दिए ।

    आयोजनाको कार्यालयले मेडिकल कलेज स्थापनाका लागि डीपीआर निमार्ण, वाताबरणीय परीक्षण मुल्याङकन -ईआईए), गुरुयोजना निर्माण, जग्गा प्राप्तिलगायतका कामहरु गर्ने छ ।

    कलेजको पूर्वाधार तयार गर्न ३ वर्षमा सक्ने लाग्ने बताइएको छ । कलेजमा सबै विधाको अध्यापन हुने बर्दिवास मेडिकल कलेजका लागि तीनसय बेडको अस्पताल निर्माण हुनेछ ।

    कार्यक्रममा शिक्षा विज्ञान प्रविधिमन्त्री गिरीराजमणि पोखरेल, राष्ट्रिय सभाका उपाध्यक्ष शशिकला दाहाललगायतको उपस्थिति रहेको थियो ।


    क्याटेगोरी : ब्रेकिङ्ग न्युज-१, राष्ट्रिय, समाज

    उहाँ द पब्लिक टुडेका विशेष संवाददाता हुनुहुन्छ ।

    प्रतिक्रिया दिनुहोस