काठमाडौं, साउन २९ गते ।
जाजरकोटमा बाढीले चार वटा घर र एउटा झोलुङ्गे पुल बगाएको छ ।
जाजरकोटको नलगाड नगरपालिका–११ चौखामा ताक्सुगाड खोलामा आएको बाढीले चार वटा घर र एक झोलुङ्गे पुल बगाएको प्रहरीले जनाएको छ ।
बाढीबाट मानवीय क्षति भने नभएको प्रहरीको भनाइ छ ।
अविरल वर्षापछि आएको बाढीले उक्त क्षति पुर्याएको हो ।
ठूलो बाढीका कारण भेरी करिडोर सडक खण्ड समेत जोखिममा परेको छ ।
वर्षा अझै निरन्तर भइरहेकाले खोलाको बहाव थप बढ्न सक्ने र आसपासका क्षेत्रमा समेत जोखिम बढ्न सक्ने स्थानीयहरूले बताएका छन्।
